由機電工程署主辦嘅「香港能源效益獎」，早兩日舉行咗頒獎禮，蘭西之前向大家介紹過商業樓宇組部份得獎名單，今日就介紹貼身啲嘅住宅樓宇組，金獎得主正是地鐵寶琳站附近嘅將軍澳新都城一期，仲同時攞埋「先驅獎」㖭。
唔講唔知，由恒基旗下偉邦物業管理嘅新都城一期，自2000年環保主題年開始，已開展一系列環保節能工作，好似喺升降機房安裝牛角扇及抽氣扇，利用空氣對流取代原有冷氣系統，電費每年慳番50萬；另以直氣慳電膽取代射燈照明，每年又慳番40萬之餘，走廊溫度亦冇咁高，等𨋢唔使好似焗桑拿咁。
積少成多，新都城一期05年度公用電費開支，比5年前足足慳咗250萬元，以6幢樓2048伙拉勻計算，舊年每戶管理費中，支付畀屋苑公用電費少咗1220元，1個月都慳成嚿水㗎。正由於慳錢有法，又夠早開始，所以同時得到金獎及先驅獎。