乘住中資股呢排炒得熱火朝天嘅氣勢，內地龍頭大行中國銀行，一眾高層30幾人日前抵港，噚日浩浩蕩蕩喺香格里拉，搞咗場投資者推介會，萬人空巷。唔少Fund佬話，入到去都迫到冇位坐，惟有揸揸冧攞本初步招股書就鬆人。啱嘅，最緊要睇清楚啲財務資料，睇吓抵唔抵，然後入飛。
上市公司好重視意頭，所以大型招股活動，揀股票號碼，亦非同凡響，呢幾日各大財經報章，翻江倒海咁搵中行嘅股票號碼，𠵱家向各位八方fan屎揭盅，答案係「3988」，同佢個仔中銀香港嘅「2388」，有3個冧把相同。
推介會只係前哨，晚上原來仲精采，中行董事長肖鋼，喺中銀大廈70樓頂樓，搞咗個雞尾酒會，由環球協調人之一嘅中銀國際出面，邀請入咗飛認購中行股票嘅12名「大孖沙」碰吓杯交吓心。路邊社消息話，現身嘅富豪，包括李超人、新世界彤叔、新地郭炳湘、糖王郭鶴年、大劉劉鑾雄等；聽講呢場世紀雞尾酒會，仲會一連三日舉行，今日同埋聽日，就分別由另外兩家協調人，瑞銀同高盛做東。
傳真︰2623-9278
電郵︰[email protected]