港交所（388）首季盈利大升95%，港交所大好友高盛原本認為盈利符合預期，維持其目標價68元及跑贏大市的評級，但可能大華繼顯將港交所目標價調高至70.90元，高盛為免執輸兼要保持港交所第一大好友地位，噚日即時大幅調高港交所目標價至80大元，港交所創出63.50元新高，收63.40元，升逾7%，接近高盛先前所定的目標價。
黑客話，現時港交所股價對散戶而言，已是高不可攀，現在買入的主要是基金大戶，高盛報告一出，港交所股價即刻有反應，可能是早有大戶想入市掃貨，昨日借高盛報告作為買入藉口，睇嚟港交所好有機會升至80元水平。現時市場擔心股份抽水，而港交所在可見將來都不會配股，投資者可驚少一瓣，今年港股咁旺，港交所好可能派高息。
筆克上升空間有限
筆克遠東（752）升至2.30元後，有些少行人止步的迹象，而且趁機配股抽水8500萬元，雖然復牌後股價表現不過不失，仍升1.19%至2.125元，但能夠再大幅炒上的機會不大。一向睇好筆克遠東的摩根大通，早前將其目標價調高至2.40元，以噚日收市價計，上升空間已經不大，加上高價配股的目標已達，將令該股更缺乏炒上動力。雖然筆克噚日被納入大摩小型股指數成份股，但相信刺激有限。
天津港（3382）上市在即，睇嚟又係一隻熱炒新股。Cookie話，投資者似買定同類股，中遠太平洋（1199）急升4%至17.85元。不過，阿虎就好懷疑呢種講法，因為招商局（144）及廈港（3378）並無跟隨大升，廈港更是逆市下跌。
阿虎