打電話與肥仔K傾日文報紙雜誌直排嘅問題，肥仔K話日本人尊重傳統，甚為可敬。但最弊嘅係日本報紙內容貧乏，新聞如同出一轍，甚為乏味，佢話如果《蘋果日報》去東京開業，整一份日文《蘋果日報》出嚟，用番直排，但以《蘋果》搶新聞作風嚟加強內容，可能會好掂，成為日本第一大報都唔定。是耶非耶，唔敢下判斷，或者保守嘅日本讀者唔鍾意睇踢爆呢，要搵出答案，可能要交十億港元學費。
正因日本報紙冇料到，肥仔K日日返學校睇IHT與FT，佢話FT《金融時報》逢星期一有一個LucyKellaway專欄，好好睇，值得推薦。左丁山日日睇FT，但以睇新聞居多，冇乜留意專欄，聽肥仔K咁講，喺五月八日星期一特登睇吓LucyKellaway。哈，呢日講得幾過癮喎。Lucy專寫商業管理、行政人員方面啲蝦碌、作狀、虛偽一面。呢日佢講到一位大軍火製造商Raytheon嘅CEO，WilliamSwanson先生喺一年前大概得閒得滯，以為自己係商界偉大領袖，可以為天下師，居然出版咗一本管理金科玉律小書，名為《UnwrittenRulesofManagement》，公司印咗二十五萬本送畀客戶與友好，股神巴菲特都攞咗幾本。呢本書嘅內容講乜嘢呀？內有三十三條「管理智慧」，例如第三十二條：千萬不要失去幽默感。
點知畀人踢咗一腳，Swanson先生就冇晒幽默感。現今世界，最麻煩有一樣新事物，叫做Blog（博客），一位年輕工程師在網上日誌踢爆，呢本書中嘅三十三條格言，其中十七條來自一本一九四四年一位工程師W.J.King嘅《TheUnwrittenLawsofEngineering》；Raytheon董事局知道後，甚為尷尬，准Swanson先生留任，但今年冇人工加，呢位CEO就自辯話佢睇好多書睇到滾瓜爛熟，故此叫下屬代筆寫書之時，下意識地背番一啲出嚟咁話！嗱，Lucy話喺管理學之中，太陽底下無新事，PeterDrucker老早講晒，一啲老闆總裁自以為係經營之神，出書教人點樣做領袖，分分鐘自暴其醜。