個市調整兩日，又試升過。恒指升60點，期指更漲133點，變咗低水65點（前日低水138點）。恒指成份股中，仲有11隻喺月底前除息，總共會拖低恒指136點。
淨係滙控（005）下周三除息，同埋中移動（941）今日除息，都已經拖低恒指76點，所以計埋除息因素，5月期指實係高水71點，炒恒指窩輪者，記得睇埋呢個數據。
窩輪係攞嚟炒，但有時要畀啲耐性先至有大茶飯食，當然所揀對象一定要低溢價，否則隨住時間推移，蝕溢價會蝕到呱呱叫。上周四推介嘅電盈C輪9773，唔聲唔聲，昨日彈升58%（最高曾升76%）。畀少少耐性嘅，一鋪番晒嚟。
中電信C輪9796：中電信（728）收2.825元，進賬5仙。其他3隻國內電訊股，近期隻隻生猛。中電信唔係電訊股咩？遲早表演，買定C輪等收錢。正路之選係9796，9月初夠鐘，輪價24.6仙，溢價4.3%，槓桿率11.5倍（有效7.8倍），引伸波幅26%。其他熱門C輪昨日隻隻升，9796反跌1格，更加值得買入。
中銀C輪4501：中行招股啲terms出咗嚟，中銀（2388）快趣紮紮跳，買啲C輪有着數，吼4501。明年11月夠鐘，輪價21.9仙，溢價4.2%，槓桿率7.5倍（有效4.7倍），引伸波幅25.3%。
章盛