工廈物業好似長炒長有，呢期又炒到葵涌，因為區內仲有唔少工廈做價落後大市，於是成為炒家入貨目標。據講，呢啲工廈唔單止價平，回報亦唔低，分分鐘有一分息。
好似打磚坪街嘅有利工業貨倉大廈，有投資者前後10日內，動用897萬，掃晒市場上3個放盤，涉及總樓面3.3萬呎，呎價由240幾蚊到310不等。呢批單位有兩個交吉，只有一個係連約，月收2.7萬，低於市價，所以暫時仲係有8厘回報。如果呢批單位全部用現時呢個價續約，加加埋埋回報都可以去到11厘；若果用市價續租，回報分分鐘上到15厘。
葵涌交通方便用家落叠
另外，同一條街嘅和豐工業大廈二樓，有個萬零呎連租約單位，以970萬成交，呎價910蚊；家吓每月租金收緊12萬，呎租約十一個三，回報近15厘。
當然，呢區由於有地鐵到，加上近貨櫃碼頭，交通幾方便，所以除咗投資客外，亦吸引用家入市，好以麗晶中心中層全層約2.2萬方呎單位，有藥廠斥資2338萬買入自用，呎價大約1050。
電郵地址：[email protected]