今日，我想為大家澄清一件事，就係噚日本欄起題嘅時候，因為出咗啲溝通上嘅問題，篇文出街嘅時候就出咗「蜆殼發力支持孫柏文」呢個題。噚日篇文就係講蜆殼石油公司，好似聽咗孫柏文嘅說話，好進取咁用天價喺加拿大買咗個「劣質」油沙石油產業。喺我心目中，由一間害死股東嘅不思進取油公司，變身成為一間有戰鬥格嘅進取油公司，好似細個睇卡通片「變型金剛」咁。
「變型金剛」裏面，就係講啲原本係非常普通嘅日常物件，好似船、汽車、貨車，變身成為超級戰士去懲惡除奸。喺「變型金剛」當中，有正邪之分，邪派嘅首腦叫做「麥加登」；正派嘅領袖就叫做「柯柏文」。咁前日，我就係一路諗住蜆殼石油係正派「變型金剛」嘅普通油公司，變身為一間「柯柏文」領導嘅進取油公司。
電話網絡嘅錯
咁噚日篇文同個題出咗街之後，我就收到好多世叔伯嘅回覆，佢哋話：「孫柏文，你個題『蜆殼發力支持孫柏文』都起得好自大啊，你咁樣唔得㗎！」我聽完之後，都抱住一份無奈嘅心情答：「我都唔想㗎！不過噚日交稿嘅時候，我冇起題，咁編輯姐姐就打電話畀我，問我個題想點樣起。我就話，不如叫『蜆殼發力支持柯柏文』，點知，可能因為我用緊嘅電訊公司，佢哋嘅電話網絡比較cheap，會忽然漏訊號，所以編輯姐姐只係聽到『蜆殼發力支持X柏文』。咁編輯姐姐就估『X柏文』係『孫柏文』，而唔係『柯柏文』。以後，我都會小心啲，唔會再講『變型金剛』，避免『孫柏文』同『柯柏文』引起混淆，我亦都會盡量唔講狗，避免令到有人將『孫柏文』同『都柏文』撈埋一齊。」
好彩啲世叔伯都明白，我稿費有限，被迫用啲網絡參差嘅電訊公司。
新礦冇 舊礦要執笠
咁講起蜆殼石油變身為一間進取油公司。孫柏文相信大家都知道，近幾年原產品價格上升，除咗因中國同印度經濟持續增長，令到需求增加。仲有因好多生產原產品嘅公司，係03年之前完全冇投資去擴充可生產量，令到需求增加嘅時候，無法增加產量，繼而出現全球搶貨、供不應求、價格飛升等現象。
咁大家可能會問：「點解生產原產品嘅公司，03年之前完全冇投資呢？好難相信做生意唔投資增產量喎。」
其實個原因好簡單，自從前蘇聯、東歐共產政權瓦解之後，前蘇聯生產嘅石油同埋好多其他礦產，開始衝進西方市場，原產品就氾濫市場，連同其他因素，令到九十年代原產品價格亦都暴跌，油價曾經見過10美元一桶。低價令到全世界嘅原產品供應公司爭相減產量，最大衝擊嘅就係供應原產品公司嘅供應商，特別係嗰啲供應機器嘅供應商，因為新礦又冇，連舊礦都要執笠，又邊度仲會有人買新機器呢？
機器嘅供應商，也自自然然減產，將工人下崗，甚至到連工廠都拆埋。咁𠵱家，聽聞有消息話，開採原產品機器嘅供應非常緊張。緊張程度係如果你今日落定單，要兩年之後先至可以收到貨，連買巨型泥頭車嘅橡膠車胎，都分分鐘買唔到。
咁唔好研究啲原產品公司，究竟想唔想增加產量，就算想，都有心無力，咁原產品價格真係想跌都難囉。
孫柏文