要飲滋補湯水？唔一定要有老雞、當歸、人參咁麻煩嘅！20分鐘唔使嘅潮氣湯水一樣補得你容光煥發！呢3款夏日湯水，以生果入饌，清心潤肺，由營養及飲食顧問Sue教路，就算好似我咁十指不沾陽春水都可以變做JamieOliver，最緊要係唔使勞動到阿媽吖嘛！
記者：梁雅芳
攝影：林栢鈞
Model：Va@Salvador
鳴謝：銅鑼灣TowngasAvenue（23672710）
Va：真係幾簡單喎！之前睇嗰啲烹飪書，講得鬼咁複雜，今次親自落廚整都估唔到咁快搞掂，而且仲幾香㖭喎！
原個蘋果芹菜湯 加速消脂
價錢：$15/1人 需時：20分鐘
紅當當嘅蘋果配搭淺綠色的西芹湯汁，色彩繽紛，勁有夏日feel。好多人都接受唔到西芹嘅味道，不過，原來西芹配蘋果嘅味道好夾㗎，仲散發出一種獨特嘅芬芳，就算唔鍾意西芹嘅人都可以一試。
材料
蘋果1個、芹菜125克、上湯3安士
做法
1.蘋果切去頂部、挖芯，放入微波爐焗3分鐘；
2.芹菜切段，用攪拌器打成茸，加入上湯煮15分鐘，倒入蘋果內就得。
Tips：蘋果最好揀蛇果，因為夠香。西芹可以先擺入蘋果內一齊焗都得，等蘋果可以吸收西芹嘅香味。
營養顧問阿Sue點睇
a.芹菜含有蛋白質、脂肪、碳水化合物、粗纖維、鈣、磷、鐵等多種營養，當中的蛋白質含量更比一般的瓜果蔬菜高約1倍，含豐富水份和纖維，並有一種能使脂肪加速分解的物質，女性滋補恩物。
b.芹菜對降低血壓、健腦都有一定的作用，近年來的研究還表明，多吃芹菜還可以增強人體的抵抗力。
c.將芹菜入饌時不要只吃莖而扔掉葉子，從營養學上而言，芹菜的葉比莖的營養成份還要高。
百搭上湯
材料：清水10公升、2棵大白菜，西芹、甘笋、洋葱各500克
做法：大白菜、西芹切細段，甘笋、洋葱切粒，加入清水煲5個鐘頭，熬成上湯，可以擺入雪櫃備用。
營養及飲食顧問柯文滿（Sue）話：以前整上湯係用雞同瘦肉，雖然甜，但脂肪重。呢個百搭上湯以蔬菜煲成，清甜得嚟又健康，多飲無妨。
原個番石榴甘笋湯 清甜透心
價錢：$20/1人 需時：20分鐘
番石榴果肉又香又軟，甘笋湯連埋果肉一啖食落口，清甜透心，最適合夏天天氣悶熱嘅時候飲。番石榴外形的的骰骰，成個打包返公司做午餐餐湯都得喇！
材料
番石榴1個、甘笋125克、上湯3安士
做法
1.番石榴切去頂部、挖芯，放入微波爐焗3分鐘；
2.隔水蒸腍甘笋後切塊打成茸；
3.加入上湯煮15分鐘，倒入番石榴內，搞掂！
Tips：要揀熟嘅番石榴先至夠香，果皮偏白嘅就比較熟喇！記得挖芯時要用陰力挖，如果唔係好容易挖穿個皮㗎！
營養顧問阿Sue點睇
a.紅蘿蔔含豐富抗氧化物，有助女性延緩衰老，增強免疫能力，改善心臟健康。
b.番石榴營養價值為各種果品之冠，特別是維他命C。
c.番石榴又含豐富的鐵、磷、鈣等，是熱帶果實中最多的一種。
原個啤梨南瓜湯 通便排毒
價錢：$18/1人 需時：20分鐘
南瓜湯好香濃，就算唔配搭其他海鮮煲都夠晒滋味。聽講兩種瓜果都有通便嘅功能，早餐飲一飲，咪可以飽肚之餘順便排毒？
材料
啤梨1個、南瓜125克、上湯3安士
做法
1.啤梨切去頂部、挖芯；
2.放入微波爐焗3分鐘；
3.將南瓜切塊後隔水蒸腍，用攪拌器打成茸加上湯煮15分鐘，倒入啤梨內。
營養顧問阿Sue點睇
a.啤梨含豐富纖維、維他命C及鉀，對有便秘困擾的人有一定幫助。
b.南瓜含有的蛋白質和脂肪含量較低，並有豐富的糖類、澱粉、水溶性纖維、鉀、鈣、鎂、鋅、維生素A、B、C及礦物質等，多食可令大便通暢，尤其對女性有美容作用。
SueProfile
15年以上教育工作經驗，澳洲工商管理碩士（MBA），具香港中文大學兒童營養文憑及具註冊幼兒教師資歷。
TowngasAvenue10式湯水
如果怕麻煩，可以假手於人，TowngasAvenue新推出10款特色湯水，都以原個新鮮蔬果盛載，包括番茄（圖）、蘋果、番石榴、洋葱、啤梨、木瓜、涼瓜、蘿蔔、節瓜、紅甜椒等，原汁原味有營養。10款特色湯水每星期會輪流推出，每款賣$58。凡惠顧TowngasAvenue午市或晚市套餐，就可以優惠價$30飲到新鮮美味嘅特色湯水喇！
銅鑼灣TowngasAvenue（23672710）
地址：銅鑼灣百德新街59-65號地下
尖沙嘴TowngasAvenue（23672713）
地址：尖沙嘴新世界中心地面L030
