下個月就係世界盃熱潮正式衝擊全球嘅大日子，雖然香港隊點樣造馬都唔使旨意有機會打入總決賽，但港人對有得賭又有得睇嘅世界盃，一樣咁熱愛，連一向發夢都叫人買樓嘅地產代理，足球風氣都好盛行，周不時有聯誼比賽。
美聯更加首次派隊參加新城財經台舉辦嘅「新城公益金慈善足球王」大賽，借世盃熱籌款。首輪賽事嘅對手係「賽馬天下」，27號開波，爭奪出線權。
今次美聯幾認真，為咗喺芸芸同事中搵出真正國腳級人馬，特登搞咗個「7人足球金盃戰」，分港九新界及工商舖，禮拜五先打外圍初賽，直接誕生四強；23號正式比賽，冠軍隊伍就可以出戰足球王大賽。
另外，當日亦係「美聯世運盃2006」活動日，除咗場波係重頭項目外，仲有其他田徑活動，畀班平時跑數跑到氣咳嘅手足，換吓場地再鬥過。
至於中記亦利用足球嚟聯誼吓自己人，早兩日搞咗場深港兩地精英會足球聯誼賽，喺深圳打，事後仲擦番餐輕鬆吓。