世界盃足球賽肯定係商場搶生意嘅黃金機會，只要有大電視直播賽事，就一定會迫到爆。若果再落啲本加多啲諗頭，咁場面係點都唔使講嘞。
上咗市嘅領匯都好積極打世盃主意，今日仲會喺樂富商場開記招，除咗講嚟緊嘅母親節商場活動外，戲肉就係公布一系列推廣世界盃嘅活動。領匯仲喺商場內設咗個「人造草足球場」呢啲以前點都諗唔到會有嘅嘢。個球場梗係畀人踢吓波過吓癮啦，肯定會吸引大批波迷嚟消費。
蘭西早前都有提過，部份私人大業主商場都有啲類似嘅推廣計劃，點知仲未公布，領匯一聲唔該就飲咗頭啖湯，睇嚟其他商場又要再加碼至掂，對住呢個反應咁快嘅對手，真係有排頭痛。
好似早前，領匯做騷話會請1000個月薪7000蚊或以上嘅顧客服務助理，下月起陸續引入全線100多個商場，即時上咗港聞版頭條，宣傳效果好過賣廣告多多聲。啲私人大業主商場起勢咁搞活動，都攞唔到咁嘅篇幅，你話領匯係咪好高招呢？
電郵地址：[email protected]