港交所新一屆董事會噚日正式開會，可以話新人事新作風，因為主席已換咗由夏佳理出任，另外又加入3個新人。DavidWebb話，噚日嘅討論好開放同有建設性，咁新人上場，同以往風格梗有些少唔同。另一董事黃世雄話，新作風令佢打爛齋缽，皆因安排下次開會日期時一改傳統，由一向每月月中改喺6月2號，但下月初佢早有安排，因此被迫缺席，係佢出任董事3年來第一次記黑豬仔。
近日有傳媒報道，話噚日董事會會傾拆細港交所股份每手股數問題，因為𠵱家1手接近12萬元，散戶好難入場。不過，管理層話要準備資料先可以討論，所以冇傾到。但因為之前傳到似層層，港交所要應證監會要求出通告，澄清話噚日會議並冇討論拆細事宜。