經紀黃日前提過，有基金大手減持超大現代（682），呢個基金身份終於曝光，原來係惠理基金，佢喺5月４日以每股平均價5.103元減持7090萬股，成手貨計落值成3.62億元。
雖然市旺有基金減持唔出奇，但惠理對超大一向長情，小初記得早幾年投資者對民企信心最低潮時，惠理入股超大的消息，即刻令超大的股價重上升軌，收尾惠理仲愈買愈多。今次惠理減持超大後，持股量由9.27%下降至6.28%。
超大昨日冇起跌，平收5元。
另外，經紀陳好耐之前提過的駿新集團（091），公布以2.5億元收購三峽燃氣，兼且以每股0.25元配股，集資3000萬元。
駿新昨日復牌，開頭係威係勢，最高見過0.325元，但隨即見有沽盤殺到，結果收0.27元，僅升1.89％，晨早買入的投資者即刻要坐艇。
不過經紀陳話，人哋單deal搞咗咁耐，唔會咁快收工，坐咗艇嘅投資者，仍有望見到家鄉。
慕容小初