行街碰到財資界知名人物安德魯F，見佢着西裝冇打呔，以為佢放緊假，於是問佢：「阿忠哥，乜放假咁輕鬆，幾時去恒生返工呀！」財資F話：「唔可以講得畀你聽，我現在仍然返緊工，唔係放假。」咦，明明有報道話財資F已自星展銀行辭職，不日到恒生銀行上班㗎，點解重會喺星展返工？
財資F話：「老闆叫我做到夠鐘先至好走，唔好即走喎！」哦，明白嘞，財資F嘅老闆就係「水哥」，阿水哥姓張，洋名Water，千祈唔好以為係Walter，恒生有位WalterCheung，係馬拉松好手，公關頭頭。星展呢位WaterCheung係投資銀行部主管，既以「水」為名，人稱水哥，廣東人以水為財，星展有位「水哥」坐鎮，自然水頭充足。按財資（treasury）界慣例，邊位仁兄仁姐一遞信，就係即日清枱起身，返屋企放假一輪先至過檔第二間銀行，好多人包括左丁山在內，都以為財資F嘅辭職消息一出，佢已經放緊假㖭。點知全部表錯情。
水哥素來知人善用，用人不疑，肯定對財資F信任有加，先至叫財資F留下，做埋啲手尾，交波之後先至離開。財資F個名又改得好噃，叫做孝忠，既孝順，又忠誠忠心，信仰佛教㖭，識講佛經，當然係看得開，放得下之人，老闆實鍾意。
財資F轉工，事業更上一層樓，老友為佢開心，但電子傳媒主持就比較擔心，佢去咗恒生之後，會唔會取消向外發言呢？恒生高層除咗柯總之外，一般比較少接受電台訪問，評論外滙走勢、資金流向等等。財資F幾年來，係電子傳媒救星，答問清脆利落，預測走勢準繩度甚高，左丁山最記得佢好耐以前曾經喺電台講，眯埋眼買加元，嗰陣時美元兌加元約莫係一點四樓下，唉吔，現在已經去到一點一，走晒大寶。如果財資F去咗恒生就封咪封口，電台財經節目主持人就少咗一位專家可以訪問咯。