香港女仔高竇難追，一向出晒名！今日新碟落場嘅《得閒飲茶》，難得以非常寫實手法，道出了港式麻甩仔追女故事；由知道你想追佢、畀機會你追佢、准你追佢……（留意程度唔同，但係從未追到手呀！）大家可能曾經吃盡苦頭了吧！女權觀眾邊睇邊嗌，有冇搞錯呀！港男邊睇、邊掩住半邊嘴，呢個咪呀邊個邊個囉！自己？當然仲未做過主角啦！
記者：朱崇德
聲效：DD5.1（粵語）、DolbyStereo（國語）
發行：洲立影視
視像比例：16:9
片長：88分鐘 價錢：$65
以男性為本位而拍攝的愛情故事，在港產片中實屬罕見，唔玩一味溫馨浪漫，小品式一些兩小口子的吵鬧問題，再加點男性主觀角度，感覺幾實牙實齒、有血有肉！而且《得》是劉德華投資嘅亞洲新星導第一擊，編、導是初哥上場的六師弟──肥仔聰；可能新的關係，可見電影唔會作太多商業計算，有人話這可能是上戲院時票房一般的原因，不過個人覺得整體自然流暢、間中出現點點天馬行空的念頭，真係相當有新鮮感覺！
愛上購物台女主播
故事取材自非常地道的香港愛情故事，仲係六師弟身邊朋友的真人真事！話說方力申在酒吧認識蒲精Viann，搭上了方知對方原來屬二打六購物台女主播，真係不知幾多人的夢想；同香港女仔一樣，起初正正常常，之後遲到、失約、喪花錢，甚至當你係「騎牛」再落D場「搵馬」，再屈你唔啱都仲得，真係睇到好多人如坐針氈般！故事中段，雖講男有情女有意，不過大家只是知己朋友，間中聚首互訴失意情事，亦係好有現實生活寫照，正是戲中林雪所謂，最愛嘅人，同你未必做得成夫妻，那種知命及暗暗看護對方的微妙關係，較諸《電車男》一類誇張、驚天動地的演繹手法，實在感重好多！
爆笑位有生活感
話明「新星導」，電影當然以新人為主！老實講，方力申算演得不過不失，有時甚至唔多使點演，淨係揦埋口面一個苦情樣，已經係相當地道的香港麻甩仔感覺；相反Viann真係幾有驚喜，好難相信佢係首次上大銀幕！唔好理係咪「做番自己」較易演，入戲演繹流暢、動作眼神同觀眾有交流！有一幕話說Viann做購物台主播時爆咗句「又係呢啲爛鬼呃人膠錶！」唔知係咪因此在巴士上少見咗佢呢？另外林家棟同小龍所做的酒肉損友，都做到綠葉作用，煙煙酒酒後，做你追女紅鬚軍師，不正正是你我身邊都有幾個嗎？不得不提嘅仲有方坐「情債監」時，劉華所做的獄警及大隻佬，叫你走兼喪畀酒你飲，再加跳舞、唱心酸的情歌，相當爆吓！可惜感覺稍為拖長，同整套電影節奏明快感覺稍有差別，否則會更好睇。
必睇Bonus：台前幕後 狠批港女
幕後人語必睇，六師弟肥仔聰會話畀大家知電影故事，其實是取材自剛離婚好友的真人真事，大家再唔會將《得》當戲咁睇，而且林家棟、小龍、方力申等都會對香港女仔性格一一評價，好似話明明自己只得80分，但就要搵一個100分男友，都幾狠批吓！而且相當真情流露！另外仲有《人魚朵朵》等嚟緊多齣「亞洲新星導」電影預告片，都幾正吓！
