新地（016）配售後復牌，不但跌穿批股價89元，且低收88.20元，大跌4.70元，大市亦由高開變低收，恒指曾升超過100點，但收17080，跌53點。滙控（005）同中移動（941）兩隻大藍籌，一上一落，滙控收141.80元，升1.70元，市場仲係睇好。
呢兩日推介嘅金威集團（910）同黃金集團（1031）都逆流而上，金威收0.32元，升8.4%。點解睇好金威，已講過，今次走勢突破，短線睇0.36元，中線就0.50元，不過，有消息話金威今次肯定脫胎換骨，冇1元都會見0.80元。黃金集團搶上2.225元收，升7.2%，早日剛話過，呢隻係個位數PE嘅濠賭股，若然有基金睇中，股價好快會升2至3成，噚日成交大增3.7倍，可能真係有計。
環保同水務係近期熱爆嘅股種，無論在外國同本港，好多升幅都好可觀，但滄海有遺珠，就係光大國際（257），理由呢？並唔係公司業績唔得，而係一系列嘅環保水務項目，明年先進入黃金收成期，家吓未有成績睇，但明年開始盈利就會以倍計上升，股價亦會翻幾番，趁𠵱家未郁之時上車，有機會賺幾個開。
市賬率低於外國同業
光國上月底高位0.83元，但因做「披成」而大幅回落到0.66元，噚日收0.69元，0.66元係配售價，亦可以視為保險線。今次配售5.1億股，聽聞有基金已上咗車，但因為未夠5%，不用公布。光國集資淨額達3.2億元，全部係用作拓展現有及收購環保項目。
05年（12月年結），營業額1.33億元，升100%，盈利1.05億元，升27%，主要係來自物業重估增值，環保投資及管理業務收入5634萬元，佔總營業額42%，溢利1387萬元，暫時仲係「細眉細眼」，但現時手上8個項目全部投入營運後，溢利將會以億元計。
集團現時的環保項目，有宜興市、江陰市及佛山市的垃圾發電、蘇州市沼氣發電、山東省淄博市及青島光威污水處理，又同深圳、山東及濟南等地簽訂協議，拓展環保業務，今年內會逐步落實。
光國每股資產值0.46元，市賬率1.5倍，相對外國同業的3至5倍，明顯偏低，以市賬率2倍計，股價可見0.92元。
郭兆誠