今年母親節又係出街飲茶食飯慶祝？搞啲新意啦子女們！送康乃馨雖然係指定動作，但都可以送得特別啲、激啲！可唔可以親手整個水晶蠟康乃馨呀？潛落海底送康乃馨又如何？再唔係織個金莎花，睇得又食得。
媽媽得一個，花啲心思，對佢好啲！
記者：黃若茵
攝影：林栢鈞、楊錦文
鳴謝：DiveAndWine
模特兒：Irene、Pheobe、Kathy&Carrie（Salvador）
為咗媽媽 玩滴蠟
身體髮膚，受之父母，母親節這大日子，當然不會叫大家去玩虐待式的滴蠟如此不孝啦！只須出動一下你的鬼主意，玩蠟頓時變得溫馨窩心。來到位於粉嶺佔地14萬平方呎的香薰園，入場費只需$5，場內提供多種玩樂，更可即場親手製作水晶蠟，於蠟中放上一朵康乃馨，教媽媽如何可以不感動？且環目四周，山水不盡，遠離煩囂，讓媽媽多吸收大自然氣息之餘，又可享受天倫之樂。
1粒鐘做蠟考耐性
園內的水晶蠟工作坊提供顏色繽紛、大小不一的碎石讓大家自創獨一無二的水晶蠟，別小看這一小杯水晶蠟，要做出特別的效果，水晶蠟便要逐層添加，待乾後才可繼續修飾，因此需時甚久，一般製作時間約1小時，單是這份耐性，已夠媽媽開心啦！
請媽媽去法國
看見園內一整片薰衣草，還以為請了媽媽到普羅旺斯旅行，看真點，雖不夠法國、日本的高大濃密，但勝在不用飛到異國也可被清香的薰衣草田包圍着，家陣除咗睇，仲可以買盆薰衣草回家種，每盆約$40至$80。
其他玩嘢
羊BB上星期出世
爸爸為博媽咪及囡囡一笑，抱起3日（探訪日計）大的黑羊仔係咁錫。
媽咪燒烤 囡囡揼骨
今次BBQ依然由媽咪出馬，但有兩個囡囡於一旁服侍，媽咪仲唔冧晒!?
BBQ後品茶消滯
這裏種植了香蜜草，加上新鮮的葉子來沖茶，有消脂及抗敏功效，啱晒愛靚嘅媽媽同囡囡啦！
母親節香薰園1天遊（必須預約）
地址：粉嶺鶴藪路655地段
查詢電話：26581399
套票價錢：成人$95、小童$78（12歲以下），費用包括燒烤套餐、自製香薰水晶蠟燭及餵羊飼料或魚糧。
交通：於粉嶺火車站乘坐專線小巴52B，於村口落車步行2分鐘便可直達香薰園，車程約20分鐘。
水中花送媽媽
嘩！帶媽媽去玩浮潛？會唔會激過頭呀？其實都係一種好普通嘅活動，唔使攞牌，有教練從旁指點，而且船上有炒米粉、泥鯭粥等，充電後下晝仲可以潛多幾轉！媽媽每日唔係返工，就係行街打麻雀，運動量絕對未達標，何不趁這母親節空檔陪她到西貢水清沙幼的甕缸群島浮吓潛吓，海水出奇地咁清，喺欣賞珊瑚途中遞上一朵康乃馨，影番張相留念，仲唔冧死!?
專人教整 金莎花
唔想日曬雨淋，除咗以上介紹嘅商場活動，呢個教整金莎花嘅function就最啱喇！5月13日及14日喺香港仔中心商場及黃埔新天地家居庭內購物滿$100（百佳除外），可免費參與金莎花工作坊1次。
免費香薰腳底按摩
13日及14日兩日除咗有金莎花工作坊外，黃埔新天地家居庭另有愛心花仙子大巡遊，大派愛心氣球畀媽媽，而香港仔中心商場則有免費享受舒適嘅香薰腳底按摩服務。母親節，果然係媽媽大晒！
工作坊時間：5月13日至14日下午1點至5點
查詢：21218344（黃埔新天地家居庭）、25530860（香港仔中心商場）
Irene：母親節帶媽媽去玩浮潛一定好開心，可以做啲平日無乜機會做嘅嘢，唔使又係食飯咁悶啦！
