袁詠儀（靚靚）早前被傳懷孕，但她與男友張智霖一直不肯承認，昨日靚靚終於親口證實已有身孕3個月。對於被指是未婚媽媽，靚靚亦默認01年已在美國跟張智霖註冊結婚。
袁詠儀與張智霖01年2月於美國拉斯維加斯註冊結婚，但當時他們因為怕影響事業發展，所以一直沒有承認，不過最近靚靚已有身孕，記者昨日再向她重提這個已婚傳聞，她在電話回覆說：「係咪結咗婚，我唔會否認，但亦都唔會親口承認，你哋自己諗啦。」
陀仔瘦6磅
01年2月靚靚和張智霖在美國秘密結婚，回港後在銅鑼灣郭富城所經營的餐廳包了全場補擺喜酒，當時出席者有郭富城、邱淑貞與沈嘉偉夫婦等。記者問靚靚01年是否在港補擺婚宴？她笑說：「咁耐嘅事唔記得啦。」記者轉問張智霖何時才正式承認娶了靚靚？他說：「等個BB誕生，我自然會有巧妙安排，𠵱家再畀啲空間我哋啦。」
靚靚懷孕後身體狀況很差，足足瘦了6磅，她說：「我喺嗰幾月前因為唔舒服去睇醫生，先知自己有咗BB，之前真係未有，所以我先否認。但個幾月前去檢查，醫生話我已經有咗，𠵱家身體都唔係咁舒服，幾乎食乜都會嘔，𠵱家剩係食餅乾同粉麵冇事。有時三更半夜我突然想食熱狗或通粉，張智霖就會揸車出去買畀我食，所以呢輪佢都幾辛苦。」
狂嘔不逛街
對於第一胎想生仔或女，靚靚說：「其實我哋都好矛盾，初時想生仔，但有時喺出邊見到啲男仔咁曳，我又想生女，但一生女又驚佢畀人呃，所以生仔女都冇所謂啦，始終做父母責任都係好大。」
此外，靚靚昨日接受商台電話訪問，她說自己最愛逛街，可惜懷孕後一直未能出街，靚靚說：「喺屋企好悶，不過成日嘔又出唔到街，呢個星期日係母親節，屋企人一定要我出嚟同大家食飯慶祝，我都會出嘅。」問到她與張智霖會為BB改甚麼名？靚靚說：「冇諗過，不過張智霖同人講不如叫張先生（老師），男女都叫得，個個都叫佢先生好型喎。」
採訪：陳月媚
