華華不嬲以為選港姐亞姐先多事非啫，勢估唔到，又尊貴又公平，仲要話係大圈子一齊玩嘅特首選舉委員會選舉仲多八婆嘢；最令華華意外係，插人插得最肉緊嗰啲，係香港哋所謂最好學識嗰堆教育界，而俾佢哋插得最應嘅受害人，就係不時捐錢畀教育界、得閒都會幫手作育英才嘅李家二少澤楷！
話說華華呢幾日睇報紙，見到高等院校教職員聯會，係咁批評二少冇資格做高等教育界選民，佢哋個幹事會委員、理大應用數學系副教授李向榮仲話，二少做校董又唔係全職，又冇為高等教育界做過咩，都可以做選民，咁理大個校工東叔服務咗教育界二十幾年，都應該有資格云云。但據聞二少都冇動氣，果真EQ高！
幫邊緣少年補英文
咁又係，二少假假哋係全東南亞至貴嗰件鑽石王老五，財貌雙全兼夾心地唔錯，又點會咁失身份同人家一般見識。之不過，華華今回都要幫佢出番啖氣，當然唔係怪責教授好拎佢同校工比啦，嗱，唔計二少捐捐埋埋畀唔同學校嗰啲錢，早年佢公、私事都冇咁忙嗰陣，都會秘密地去教吓啲邊緣少年英文，學校想搵佢同學生分享心得，只要得閒佢一定冇托手踭……咁都俾人話冇貢獻，你話係咪好hurt呢！
李華華
讀者如有任何意見或報料，歡迎發送電郵至[email protected]。