任天堂發布會安排喺上午，未致跟微軟撞時間，否則一眾中外傳媒都唔知點算！在發布會上，正式公布新主機Wii定於06年尾推出，跟PS3埋身肉搏！雖售價未定，不過按任記主機唔過2.5萬日圓（約港幣$1,700）慣例，相信Wii仍會維持呢個水平。
手掣愈玩愈多功能
硬件規格跟早前公布相若，如IBM處理器Broadway搭ATi顯示晶片Hollywood，齋聽兩個名已感受到繽紛嘉年華嘅熱鬧氣氛！手掣定名為Wiiremote，設計上冇改動，依然以藍芽作傳輸（5米有效），除設有動作感應外，仲內置埋喇叭喺手掣，玩法真係無限大！
雖然不設任何硬碟，不過都內置512MB記憶體，而功能上除咗如早前公布可下載FC、SFC、PC-Engine及MegaDrive遊戲外，仲正式公布對應舊有GCGame。
大量廠商撐Wii
遊戲方面，除咗全民期待嘅Wii版《MadeinWarrio》、《薩爾達》外，好多第三廠商一樣力撐，如SE一堆重製版《FF》，最吸引係Wii版《DragonQuest：Sword》，透過手掣嘅體感設計，將早排勁Hit嘅《劍神》玩法搬過嚟，諗起揸住把劍「實戰」史萊姆，已經興奮到爆！
世嘉亦剛公布推出Wii版《SONICWILDFIRE》，一樣活用手掣感應器之奧妙，如左搖右擺嚟避開障礙，向前「篤」攻敵等，完全擺脫過往超音鼠一味齋衝嘅玩法。
