公民黨呢輪真係左右不討好，左派批佢哋唔肯同北京配合，而右派就話佢哋搞公平主義，同自由經濟背道而馳，唔怪得湯家驊（Ronny）噚日同記者推銷佢份公平競爭法嘅第二號報告書，會咁感觸良多。
因為佢總認為香港作為一個咁先進嘅城市，冇理由唔同西方社會看齊，防止啲本身喺市場有支配地位嘅企業或者公司，濫用權力，搞到啲小商人冇啖好食。
唔講唔知，原來Ronny當年喺英國牛津，就係專攻公平競爭法同埋法律衝突，以為好有前途，點知返到香港，先知道香港唔搞公平競爭呢科嘢。Ronny就引入公平競爭委員會做咗好多研究，不過最終做唔做要睇煲呔喇。
目前令湯大狀最不安嘅係籌錢冇門，佢話當日話想組黨，好多商界都話好，到時一定支持捐些少，但係政改一役，啲商家改晒面口，約見面都話不如上寫字樓傾；喺街上行，就好似有麻瘋病咁，冇商界朋友敢行近，個個都話要等煲呔連任再講喎。
傳真︰2623-9278
電郵︰[email protected]