有億萬身家又享盡齊人之福嘅賭王何鴻燊，連孫女何家華都生咗1仔1女，即係連太公都做埋，究竟仲差乜嘢係賭王冇嘅呢？燈燈燈櫈，就係1粒男孫嘞，賭王其中1個女超鳳生咗兩個都係女，即係話都係做阿公啫，要抱孫就要寄望新抱啦。
四萬咁口
噚日賭王去咗灣仔演藝學院出席活動，問佢個仔何猷龍老婆羅秀茵係咪有喜，賭王起初大賣關子，不置可否，後來被再三追問，賭王笑晒口咁話：「你哋自己問番佢哋（指兒媳）啦。」再問佢快將抱孫一定好開心，賭王就四萬咁口話：「抱孫噃，梗係開心啦！」咁就要睇吓羅秀茵呢胎係男定係女啦。
其實前嗰排何猷龍做廿四孝老公，陪嬌妻羅秀茵去養和睇醫生，當時見羅秀茵個肚已經微微脹起，問何猷龍係咪老婆有喜，佢就淨係笑咪咪唔答。
