遊戲界3大巨頭搶喺E3前搞發布會，噚日就率先睇過SONY陣營嘅PS3，跟住就輪到微軟同任天堂撞埋同一日舉行。本以為微軟XB360出咗咁耐，理應以大堆新Game跟對手抗衡，殊不知佢都有唔少硬件周邊公布！當日微軟總裁BillGates更到場力撐，仲為大家預覽即將喺今年推出嘅XB360專用HDDVD機、XBOXLIVEarcade及無線軚盤，實行軟硬夾擊PS3！
記者、攝影：陳國輝
唔知係咪有BillGates呢位星級大老闆駕到關係，今次微軟選擇喺美國荷李活舉行「E306」預布會。當日到場傳媒人數近千人，發布會更分為上下半場，上半場由XB360高層親自解說新產品嘅特性；而下半場，就畀時間讓玩家親自試玩，感受吓新Game嘅威力。
外國傳媒點睇？
撐街機舊作
以前一直好想玩番啲街機舊Game，𠵱家除咗有幾百合一遊戲之外，簡單到上網單撈就得，更加方便！
可嘗一機兩味
XB360再唔止係一部遊戲機咁簡單，加入埋HDDVD機之後，佢同時可睇埋高清影碟，增加娛樂性。
期待手機Game
一直有玩開手機遊戲，但講到互聯性真係唔夠勁。難得XBOXLIVE加入到Windows手機，可令手機互動更強，值得期待！
HDDVD機勁袖珍
眾所周知，PS3採用Blue-Ray格式影碟，而XB360則剛好相反，採用HDDVD格式，再一次擺明打對台！今次微軟就正式宣布喺暑假推出外置式HDDVD機，令XB360都加插高清影碟嘅能力。外觀用上襯番主機嘅純白色，再加埋的骰兼袖珍嘅體積，確實引死人，不過售價未定。現場所見，或者係樣辦關係，現場職員只用其他HDDVD機嚟作播片示範，甚至連記者想影幾張相都被婉拒，有啲可惜！
XBOXLIVE現身手機
軟件方面，《BlueDragon》同《DeadRising》留番E3度先試玩，其他注目作當然係自家嘅《Halo3》，從展示影像中看到，《Halo3》在XB360上表現更為高超，角色細緻到嚇死人！而對戰模式及武器亦增加不少，相信能將XB360銷售量進一步推高。
跟遊戲及XBOXLIVE而推出嘅周邊產品亦相當多！例如無線手掣，藍芽耳筒等，最搶都係全球首套無線軚盤，完全擺脫「駁餐懵」嘅煩惱，玩落肯定過癮得多！XBOXLIVE亦首次現身於Windows手機，只需喺手機安裝「MobileGamecenter」，即可單撈遊戲，然後跟朋友對戰或交流打機心得。記得NokiaN-Gage也曾玩過類似招式，最後能否普及就要靜觀其變喇。
