房地產投資信託基金喺香港都興咗一陣，對散戶嚟講，可能已經有啲過氣㖭，好似鷹君分拆嘅冠君產業咁，好多人都認為唔係咁吸引，寧願留錢認購明日招股嘅天津港，甚至下星期招股嘅中國銀行。
不過，鷹君副主席羅嘉瑞就繼續努力推介，除咗之前不斷喺冠君唯一資產──花旗銀行廣場搞節目，增加市民對嗰幢大廈嘅親切感之外，又捐100萬元畀公益金，揀個靚靚股票冧把「2778」。
據知情人士講，港交所留定咗一批幸運號碼，準備上市嘅公司畀50萬蚊，就可以喺裏面抽一個靚冧把，畀100萬就可以自己揀。雖然話有個8字跟尾，但唔少中國人都唔係好鍾意有咁多個7字，所以「2778」算唔算靚冧把就真係見仁見智。
不過，消息人士同華華講，花旗銀行廣場所在嘅地皮，地段編號係「8888」，真嘅話咁又唔同，「全發」噃！