真的愛妳:媽咪至Buy520 得森美中咋!

真的愛妳:媽咪至Buy520 得森美中咋!

母親節呀母親節,這幾天人人都掛在嘴邊的這個媽媽節日,究竟你會點樣過?今日先來個星光熠熠耀母親,好向藝人偷橋。眾星親筆寫下對媽媽藏於心中的愛意,也分享跟媽咪度過母親節的難忘經歷。唉,只可惜,10個街訪母親有9個都冧嘅520(我愛你),喺群星語錄中只得森美有「愛你」的明示!當然,溫馨語句依然滿瀉,看過他們畫的畫、說的話,你今晚也許忍不住要拿起小時候用過的畫筆,繪一張心意卡,14號那天送給媽媽。

記者:黃若茵 
部份攝影:黃子偉、陳盛臣、周旭文、楊錦文

Q1:今年母親節玩乜?
Q2:最難忘的母親節。

星光熠熠之最大獎

街訪近30位母親,近半媽咪都揀最鍾意Kelly同森美所寫嘅心意卡。梗係啦,一個祝媽咪靚一世,另一個就扮BB畫奶嘴兼講LovingYou。至於唐寧都有6位媽咪Buy,我諗,係因為群星之中佢寫得最多字,呢啲就叫誠意喇。

森美跟另一個媽媽過

大個仔喇仲含奶嘴?都係感激媽媽養育之恩啫。「LovingYou」字句說中了媽咪最啱聽嘅「我愛你」。
Q1:會跟一個小朋友的媽咪到外地度過,係邊個?心照啦!
Q2:有年母親節前夕跟媽媽嗌交,到第二晚吃飯時大家還是黑口黑面,好難受!終於回家途中經過公園時,拉着媽媽道歉。

最啱聽

Kelly靚足一世

Kelly要媽媽靚足一世,實行兩母女都咁明艷照人。雖然唔係露肉講「我愛你」,但凡女人聽到都實受。
Q1:媽咪鍾意食牛排,所以會帶媽咪去擦一餐勁嘅。
Q2:有年細佬喺上海拍劇,母親節同埋爹哋媽咪一齊去上海,順便慶祝爹哋生日,一家人喺外地過母親節好特別。

唐寧媽咪愛屋及狗

唐寧媽媽本身不愛狗仔,但唐寧卻在家中養了4大隻,媽媽愛她,也因此愛上她的狗呢。
Q1:會親自下廚煮飯畀媽咪食。
Q2:小時候媽媽不准許我自己1人出街,但某年母親節我趁媽媽不在家,偷偷落街買了1枝花,媽咪收到後又嬲又開心。

最狗

笑中有淚劇情組

精選以下幾位,都有一個幾值得分享嘅難忘母親節。有啲都幾爆笑,亦有啲笑中有淚㗎。

吳日言為媽咪殺入金舖

吳日言畫上大花小花各一朵,大那一朵當然是媽媽庇蔭着自己,並寫上「多謝你一路嘅照顧」。
Q1:今年要提前慶祝,請媽媽食飯外,還會做東出錢帶她Shopping。
Q2:讀書時有年做暑期工,將賺到的錢拿去買了1隻鑽戒給媽媽,咁大個女第一次入金舖。媽咪收到後當然話我嘥錢,但卻笑不攏嘴呢!

連凱冠軍花瓶做禮物

相隔兩地,連凱不忘叫媽咪不要擔心,寫上「Don'tworry,willbe"BACK"Soon!」
Q1:未來幾個月會抽時間返L.A.探媽咪補祝。
Q2:小學嘅時候親手做咗一個陶瓷花瓶,重攞咗學校嘅冠軍,母親節就將個花瓶送咗畀媽媽。

張敬軒送花拜山得罪媽咪

張敬軒非常慷慨,唔止祝自己媽媽身體健康,仲要天下的母親都快樂。
Q1:適逢媽咪喺廣州開新舖,所以會封$8,888嘅好意頭利是畀媽咪。
Q2:中二時爸爸買花送畀媽咪,但卻買錯菊花同劍蘭,我自己衰多口,話束花似拜山,媽咪嬲咗成晚!第二日送番張卡畀媽咪賠罪。

焦媛床頭卡眼濕濕

先媽媽之樂而樂,焦媛果然是孝順女。
Q1:剛剛學咗兩道燕窩菜,可以親手煮畀媽咪食滋補養身。
Q2:有一年親手畫咗張卡,但媽咪好夜先收工,於是收喺媽咪床頭,第二日爸爸話我知嗰晚媽咪開心到眼濕濕。

Leo同媽媽講初吻

「無法可修飾的一對手,帶出溫暖永遠在背後……」不妨唱這歌去表達對媽媽的愛吧!
Q1:今年會送花畀媽媽,女友之後佢係第2個收到我送嘅花。
Q2:數年前母親節前夕做緊《森美移動》玩遊戲,我輸咗,要即場打電話畀媽咪同佢講初吻嘅經歷,就係咁俾阿媽知道咗我嘅初吻。

實際型仔女請食飯

簡單原是美,不過請媽咪食餐飯、睇場戲,總之陪在一起已經係最好嘅節目啦。

at17你咪理,我愛你

見Ellen平日都成日笑哈哈,難怪母親節都叫媽咪笑多啲!而二汶知道媽咪錫自己,索性畫上自己的肖像送畀媽咪。
Q1:二汶知媽咪鍾意睇Drama,所以一早買定飛陪媽咪睇《你咪理,我愛你,死未!》舞台劇。至於Ellen嘅哥哥今年返咗嚟香港,一家人陪媽咪食飯。
Q2:異口同聲說每年母親節都好平淡,最緊要平日陪多啲媽咪喎。

蘇志威回港補祝

今年母親節要到外地工作,但回港後一定會同媽咪補祝。
Q1:每年都會請媽咪食飯,今年亦不例外。
Q2:每年都好難忘,最緊要係抽到時間陪媽咪。

少爺占阿媽好正

生得出你咁大個仔,媽咪梗係正啦!
Q1:當然要陪媽咪食飯啦!
Q2:記得初初出來工作,賺錢不多,但母親節封咗幾千蚊嘅大利是畀媽咪,好難忘。

阿喱實行打牌鬆章

為報答媽媽,你會唔會成日請佢食叉燒飯呢?
Q1:食飯之餘,梗會陪阿媽打牌,我自然會醒水鬆章畀阿媽啦!
Q2:因為我嘅出世,令到媽媽有第一個母親節,所以媽媽生咗我一定係最難忘。

Oscar唔知道有母親節

感激無論做任何事,包括開Concert都得到媽媽的支持。
Q1:今年3代同堂,同媽咪及婆婆一齊去西貢食海鮮,平日怕高膽固醇我唔畀佢哋食,母親節就破例一次啦!
Q2:細個時媽咪冇話我知有母親節呢樣嘢,大個啲先知,覺得嗰段以為冇母親節嘅日子最難忘。吓?

廖碧兒飛過加拿大

簡單一句「HappyMother'sDay」外,睇真啲,都有唔多起眼嘅「囗U」喎。
Q1:媽咪同家姐都喺加拿大,但佢哋喺唔同嘅城市,希望可以同媽咪一齊飛去Join埋家姐一齊慶祝。
Q2:一定係細個嘅時候,諗番起以前日日跟媽咪一齊嘅時光覺得好可貴。

街訪:媽媽最啱聽?

簡簡單單3個字,不易對媽媽說出口,卻是媽媽最想聽到的,各位,Get到母親節要同阿媽講乜嘢啦!

黃太:「梗係想聽我愛你啦,聽到一定冧死。」

黃太:「最錫你、最愛你、最鍾意你、最掛住你……是但講到一句都夠開心。」

方太:「最好就同我講我可以退休,等我休息吓。」

張小姐:「希望阿仔學好啲英文,同我講ILoveYou或者HappyMother'sDay。」