股壇瀏覽器:勵晶高追要睇清

股壇瀏覽器:勵晶高追要睇清

新地(016)近期不止劈價促銷貨尾套現,噚日仲停牌配股抽水,幸好唔係劈價配股,折讓幅度只得3-5%,否則地產股肯定出現股災。
老行尊話,新地配股意味郭氏兄弟認為新地股價已經很高,但由於認購反應熱烈,反映搶貨的芬佬認為大市升勢未盡,仍有得炒。新地在10年前,即96年1月以每股62.13元配股集資逾40億元,當時市場處於牛市,配股引起市場懷疑大市將牛去熊來。結果係股市不但未有大調整,反而進一步炒高,直至97年亞洲金融風暴來臨才出現熊市,其間新地炒咗好幾轉兼升破百元大關,高見109.50元,所以今次新地配股,亦唔使太驚青。
勵晶(575)近兩日急升,累升61%至0.58元。黑客話,勵晶去年11月與雲南銅業組成合營公司,進軍內地銅礦業務,屬於礦業概念股。近日升幅有追落後味道,不過要注意是該股近日發行一批2000萬美元(約1.56億元)可換股債券,行使價只是0.2615元。

民生國際傳抽水

從事珍珠養殖及珠寶業務的民生國際(938),傳獲國際級珠寶商睇中有意入股,股價急升,公司好快就發出不明股價異動聲明,但仍有買盤繼續掃貨,勁升43.86%至0.41元,以全日高位收市,成交額1238萬元。
民生國際最近計劃投資1億元於內地浙江的諸暨珠寶城,有資金需要。據講公司本來唔想批股,但有投資銀行搵上門,游說公司趁高抽水,如果獲得著名基金認購,更可以成為炒上的藉口,總之就搞到公司管理層心郁郁想配股。由此可見,投資銀行為搵生意不斷游說上市公司抽水,投資者絕對有理由憂慮抽水活動陸續有來。
阿虎