Hea：學少林功夫唔使返大陸金鐘罩≠刀槍不入

「少林功夫醒，真係醒；少林功夫勁，確係『近』……」星爺套《少林足球》同《功夫》講到天下武功出少林，《龍虎門》又講練金鐘罩嘅羅剎教首席護法金羅漢係超級高手，少林功夫真係咁天下無敵？7月，全港第1個少林武術中心成立，請嚟北少林寺幾位武術師傅親自教授，想學？得！不過你咪諗住學到刀槍不入嘅金鐘罩喎，因為永欣師傅話：「金鐘罩無話要練到幾多關幾多關，更加唔會刀槍不入！」
記者：許維雅
攝影：陳陶鈞

搞日營同武僧短聚

想學少林功夫？𠵱家唔使返大陸喇，因為6月大嶼山有間「香港少林武術文化中心」開幕，學少林功夫唔使山長水遠上中國少林寺。心郁郁想學又怕辛苦？咁又唔好諗到咁嚴重住，中心落成後會先開辦學生武術日營，無得過夜，只可以同武僧短聚。事先聲明呀，日營節目包大澳半日遊，參觀棚屋、楊侯古廟、關帝廟、將軍石等名勝，之後聽師傅簡介少林發展、睇埋武僧示範少林基本功，講真絕世內功一日半日一定學唔到，但係可以畀你近距離接觸少林武僧，明白練功可以強身健體嘅道理，都算新鮮感十足，百零蚊玩足1日當小朋友暑期活動相當不錯。玩過覺得有興趣咯，先參加遲啲舉辦嘅家庭營，再想認認真真學少林功夫咯，先再考慮參加更全面嘅習武班都未遲。

硬橋硬馬真功夫

7月開營，屆時永欣、延康同延亭3位有多年習武經驗嘅少林師傅會駐場授武。同《少林足球》裏面嘅星爺諗法一樣，宣揚少林武學點都要有番啲噱頭，星爺選擇同大師兄Jam歌，大師兄有碎玻璃樽鐵頭功咩？延亭師傅都有！仲即席表演硬橋硬馬真功夫。鐵頭功係硬氣功一種，只見師傅揦住把鐵尺起勢自己扑自己額頭，鐵尺即時斷開幾截，現場嘩聲四起拍爛手掌，好勁呀。

師傅個個有料到
1﹒延亭師傅

自幼習武，擅長少林拳法、器械、養身功、硬氣功如鐵頭功等，下山後不斷開辦武術學校，銜頭多不勝數，包括嵩山少林寺第34代武僧總教練、澳門武術教育中心及河南少林功夫學校校長等。

■師傅攞出2支鐵尺，然後運氣，鐵尺望落有啲生銹，不過好粗吓。

■2支鐵尺一次過扑頭，只斷1支，失敗咗少少。

■師傅運氣再扑，第一次都唔斷，第二嘢就成功將鐵尺粉碎，好睇過《少林足球》呀。

2﹒永欣師傅

自幼拜少林寺釋行書大師學武，兼修佛法、禪學及少林醫學，擅長少林拳法、器械、氣功、梅花刀、達摩劍及達摩杖，1985年任河南省「少林拳太極拳專習院」少林系主任及總教練，翌年於「96全國武林精英邀請賽」中獲「武林名師」榮譽。

3﹒延康師傅

16歲開始於嵩山少林寺習武，擅長少林拳法、器械、八段錦、羅漢拳及通背拳，1993年拜現任少林寺第30代方丈釋永信大師門下，收為第34代護寺弟子；唔止咁，佢仲喺2000年到「莫斯科少林武術研修中心」任總教練，學員包括俄羅斯總統普京女兒。

徒弟仔ShowTime

記者會上有大班徒弟仔表演，細至7歲大至17歲，個個一身好武功，佢哋全部都係中國各地少林武術學校嘅俗家弟子，跟正常人一樣可以食肉結婚。至於3位師傅都做過出家人，不過下山授徒就會還俗。喺呢類學校受訓，原來唔使錢，不過訓練過程十分刻苦，除武術外亦會學少林文化、讀書寫字，每周得1日假，唯一娛樂係睇電影唱歌，唔怪得記者會上美食當前，成班徒弟仔仆出去搶食喇。