近排發展商賣樓，手法認真飄忽。上個禮拜減價賣荃灣爵悅庭嘅新地，唔使幾日300件貨尾清晒倉。日前，輪到同系上水皇府山傳來劈價消息，市場流傳8個低層單位價單，由3300至3800蚊呎左右，價錢比舊年年初平咗近兩成。有代理仲話，當日已賣咗成十間。不過，發展商就急急彈出嚟唔認數。
噚日負責銷售嘅新地代理執董周國賢，緊急開記招，對於皇府山劈價消息，佢話只係「輕微調整售價」，唔係劈價，為免市場訊息混亂，所以要高調澄清喎。而市場流傳減價價單，佢話唔係新地發放嘅。至於輕微調整售價，係想帶起貨尾銷情。
查實輕微調整又好，劈價又好，都係代表售價有變動啫，唔通係劈價迴響太大，要收一收火。一陣又認減價，一陣又唔認，究竟幾時真，幾時假？