前兩日華華講過賓卡要有一技之長，恒生柯清輝就唔止一技咁少，淨係睇佢呢兩個月，先係復活節前約傳媒唱K聯誼，之後同小朋友打乒乓友誼波，勞動節前拉埋老婆同兩個仔上山種樹，噚日仲手持波板糖鼓，同一班特殊學校嘅學生合奏樂器，若果有全能賓卡選舉，睇怕佢都入硬三甲！
講到喺公開場合玩樂器（雖則已經唔係第一次，上次佢喺文化中心對住幾百人表現拍手掌），柯大俠就好坦白咁講：次次都係臨急抱佛腳，今次玩「波板糖鼓」，都係事前練咗一陣咋。表演完之後，佢仲笑笑口話：「都算過得去，合格啦！」
個音樂會一共兩場，請咗11間總數300幾個特殊學校學生做聽眾，欣賞香港管弦樂團樂師演奏，場內唔少學生都睇到手舞足蹈，離場時仲講咗句「多謝UncleOr」！