喺七八十年代，兩位香港財爺夏鼎基同彭勵治，佢哋嘅第二代同英資洋行太古，以及太古旗下國泰航空好有淵源。
話說小夏鼎基3年前專登從英國過嚟幫國泰打官司，成功為國泰爭取復飛內地航線。彭勵治個仔彭勵志（圖），直情幫太古同國泰打工，85年底加入太古做見習生，之後有10年為國泰賣命，04年調到同系內嘅港機工程做營運總裁，係公司第三把交椅。
彭勵志噚日出席港機股東會後同華華講，當年揀入太古係覺得太古似個大家庭。梗係啦，佢老竇彭勵治擔任財爺之前，係太古主席嚟嘛，唔入太古，唔通入渣甸！唔驚俾老竇打咩。彭勵治好威水㗎，八十年代初俾政府從太古挖角擔任財爺，就係佢響83年為香港制訂聯繫滙率。𠵱家年薪接近千萬元嘅金管局總裁任志剛，當年就係佢手下。