雖然希慎興業嘅管理層成日俾人話保守，翻新一個項目都左計右度，但佢哋對班忠心股東就好肯搞新意思，好似前年，希慎為咗慶祝旗下利園二期開幕，向每位股東送贈港麗酒店出品嘅Tiramisu蛋糕一個，自始亦養成每年股東會向小股東派禮物嘅習慣。
舊年送嘅就係一個靚靚「IloveCWB」布袋，即係「我愛銅鑼灣」，點解要愛銅鑼灣唔愛筲箕灣？希慎係銅鑼灣大業主之一，唔使再解喇啩。
至於今年股東會送啲乜？咪就係蛋糕一件囉！又係蛋糕，但相對前年嗰個，似乎縮咗水噃！唔好以為希慎孤寒咗，今年希慎個股東會喺超五星級嘅四季酒店搞，個蛋糕亦係四季嘅出品（圖），唔係話貪慕虛榮，但華華同同事分享件蛋糕，個個都豎起手指公㗎。