新盤市場因為貨尾大減價搞到立立亂，投資者想搵餐晏仔都幾難；但另一邊廂嘅工廈市場，熱炒氣氛幾乎直追90年代初，各區新舊廠廈都有人炒，皆因樓價跌得太殘，就算係近市區嘅一兩萬呎廠，都係幾百萬有交易；即使不斷接力炒上炒，講緊都仲係幾百蚊呎，到最後仲有用家肯接貨。好似葵涌就有單廠廈成交，4日內轉手3次，最後一轉仲要係持貨不足兩個鐘就摸出，簡直神奇。
利嘉閣蔡鳴楚話，葵定路18至30號生記工業大廈，低層全層約1.2萬呎，上個禮拜四以300萬由炒家甲入貨；今個禮拜一由炒家乙以504萬元接手，4日內賺204萬。有個用家唔知係行得慢、睇得遲，定係有其他原因，竟然喺炒家乙接貨唔夠兩個鐘，又睇中個單位，仲要肯用732萬元接貨，結果炒家乙228萬袋袋平安；個單位前後4日升咗1.4倍，呎價由250升到去610蚊。