對孫柏文來講，蜆殼石油公司（RoyalDutchShell）一向以嚟，都係世界上第二最不思進取嘅石油公司，第一就係現稱為BP嘅英國石油公司，不過因為今日係講蜆殼，所以我對BP嘅評語，留番第日先講。但係，今次孫柏文一定要隻金手指去讚蜆殼，因為佢哋卒之做咗啲令我非常滿意嘅嘢，令我刮目相看。
蜆殼噚日宣布，用23億加元（相等於161億港元）去買一間每日生產1.2萬至1.4萬桶石油嘅加拿大公司。做個對比，中海油每日生產40萬桶石油，市值先得2648億港元，即係話，如果用蜆殼買嗰間石油公司嘅價，中海油就至少值13元一股。噚日收市，中海油先至得6.45元，所以話，蜆殼係唔係好進取呢？大家作為金手指嘅中堅fan屎，都應該知道我一向以來都非常喜歡進取嘅石油公司。「進取」嘅意思係，用天價買啲最劣質嘅石油產業，咁今次蜆殼不但出天價，仲要買啲生產劣質石油嘅公司。蜆殼嘅收購目標，就係一間出產由油沙提煉出嚟嘅石油嘅公司。
愈劣質就愈吸引
大家一定會問：「點解，孫柏文咁鍾意啲油公司用天價買劣質石油產業？」理由其實好簡單，因為係金、銀、銅、石油價格飛升嘅世界裏面，最有機會「刀仔鋸大樹」嘅投資，就一定係啲劣質嘅油田或者礦。甚至乎，愈劣質就愈吸引，因為正當油田或鐵礦係劣質，就等如生產成本愈高。大家可能會追問：「生產成本高，又有乜好？成本高，會賺少啲㗎喎。」
幫大家計條數，有兩間石油公司，佢哋除咗每桶石油嘅平均生產成本唔係一樣之外，佢哋嘅石油蘊藏量、生產量、銷售網絡等等，都係一樣。咁第一間石油公司（下稱為A公司）嘅平均生產成本係20美元一桶石油，第二間石油公司（下稱為B公司）嘅成本係60美元一桶石油，不過油價只係70美元一桶，喺大家心目中，A公司一定優勝過B公司，因為A公司每桶石油賺50美元，而B公司就只係賺10美元一桶。
今時唔同往日
咁油價如果升7%至75美元一桶，A公司嘅利潤就上升10%，A公司嘅利潤升幅同油價就差唔多。不過，B公司利潤就會由每桶賺10美元去到賺15美元，即係B公司利潤上升50%。如果公司市盈率，即係話公司每股盈利同股價比例唔變，B公司就會因利潤上升50%，股價都會升50%，A公司嘅股價就只會升10%。當然，如果油價跌穿每桶60美元，A公司亦只會面對盈利倒退，不過B公司就會面對完全冇盈利嘅局面，甚至會蝕錢。
所以今次蜆殼石油用天價買呢間加拿大石油公司，亦都代表蜆殼卒之認同孫柏文嘅講法，油價繼續升！幾年前，蜆殼石油同其他油公司一樣，都覺得油價上升係一場夢，仲要係午睡好快夢醒嗰隻短夢。唔好話用天價買劣質石油產業，當時全世界嘅油公司，冇一個投資增加生產量，就連用啲錢去做探勘都好似要佢哋死，個個一係大大力派息，一係就用錢食其他公司，去整頓運作節省營運成本，達至慳錢，跟住又派息。
今時今日，多得我嗰隻金手指嘅出現，為國際油公司股東服務，令到蜆殼石油咁進取，都係講嗰句：「今時唔同往日！」
孫柏文