近期減價嘅貨尾盤，暫時都只係集中新界區，不過影響已遍及港、九，就連港島區大型屋苑柴灣杏花邨，都有業主驚到要減價去貨，好似啱啱成交嘅18座低層3室，732呎，成交價290萬，呎價3962，唔過4000蚊。
世紀21區域經理鄭智鍾話，其實杏花邨耐唔耐都有一兩宗呎價低過4000蚊嘅成交，多數係個盤質素較差，又或者市況唔明朗，業主減價求售。
今次呢宗，好明顯係受減價氣氛影響，業主原本叫價330萬，到最後以290萬成交，減幅超過一成，比市價4328蚊，低咗8.5%。
鄭智鍾透露，杏花邨今個月頭10日，只有5宗買賣，比4月份同期少咗四成，有心執平貨嘅買家，可以趁業主心態較弱嘅時候講吓價，佢估計現時芸芸放盤之中，約10個左右呎價有機會下試4000蚊。