公職王李業廣退任港交所主席，好多經紀懷念佢，因為今年港交所股價大躍進。有個經紀有4個牌，後來換成400萬股，噚日身家接近兩億四，真係唔使做。
咁李業廣咁受歡迎，點解要退休呢？佢話，退休個人會老得快，但身體真係唔係幾好。好似在空氣差嘅日子，喺中環出入幾乎唞唔到氣。
李業廣本身係潮州人，但佢爸爸一早就嚟咗香港讀書，係男拔萃校友，二十年代畢業後到上海升讀大學，點知俾間船公司請咗做經理，因為當年好少人識英文。之後在上海娶咗原籍廣州嘅李媽媽，李業廣在上海協和讀小學，初中一至移居香港，在九華做第1屆畢業生，再到倫敦念會計及法律。所以，佢上海潮州廣州都係母語，英文亦冇問題。
李業廣話，爸爸剛剛於今年初過身，99歲，媽媽就再早少少辭世，兩人都好長壽。佢話香港人愈嚟愈長壽，將來老年人會愈嚟愈多，所以強積金好重要。咁強積金個主席位佢會唔會繼續坐呢？李業廣冇講到，不過，證監主席就一定唔會做嘞。邊個適合做？佢話要問政府喎。
爆料熱線：29290000、27860099
報料傳真：26239278
報料電郵：[email protected]