新地（016）又做咗股市新聞主角，配股吸水100億。個市升到咁上下，唔係呢間抽水，就係嗰間抽水，一啲都唔出奇，股民冇乜反感。但較早前兩個新界樓盤劈價賣貨尾，則唔少舊年買落嘅業主，即刻做咗樓蟹，媽媽有聲。有讀者話，以前係睇電視廣告買樓，電視拍得好靚，直頭以為係外國的豪宅，講到天上有地下無，連個樓盤名都好似抄倫敦1個高尚住宅區。到頭來，大業主啲貨清得八八九九，然後七折八折賣貨尾，唔火滾就假。
短期個市，難免反覆。賭大市上落，做吓恒指輪買賣。
恒指C輪9940：恒指昨跌167點，收17133。估計萬七點唔會跌破，吼住跌到萬七點邊邊，低買恒指C輪，計數買嘢，揀9940。隻輪9月尾到期，輪價63仙，溢價1.3%，槓桿率9.7倍（有效7.7倍），引伸波幅20.1%。
如果嫌9940係「大價輪」，想搵啲輪價較細嘅埋手，則揀3791，3791同3792都係在10月27日夠鐘，但溢價着數過3792少少。
恒指P輪3829：個市如果唔跌，而忽然升多三兩百點，博回吐，吼恒指P輪。正路對象係3829。
隻輪11月尾到期，輪價20.4仙，溢價4.4%，槓桿率16.8倍（有效8.7倍），引伸波幅17.5%。無論造好造淡，都係短線為主，實行密執密食。
章盛