以天然陽光曬衫當然最理想，但香港狹小地方，晾衫是一直難以解決的問題，遇上雨季就更煩人。惟有將洗淨的衣物晾於室內，但必須懂得搵位，免阻礙自己出入！為了更方便快捷，有幾件法寶唔少得，記住「要拉要撐」4字真言，室內慳位晾衫好easy！
記者：陸俊雄
攝影：陳盛臣、陳陶鈞、周旭文
Model：Vicki
偷位晾大件衣物
香港地空間有限，要盡用空間在室內晾衫之餘，也要借助一些小型工具幫手！
慳位1：浴缸頂
浴缸，不會是你經常進出的地方，這個空間不要浪費呢！浴缸與天花有一定距離，利用晾置長褲、長裙最適合不過，而且浴缸內有去水位，夠晒方便！
WideRack伸縮架，包括5支伸縮棒，夠晒穩打穩紮。只要將佢拉開撐牆，幫你晾到好多衫。
將5支伸縮棒當中最外邊２支，調校到所需長度，左右兩端撐牆，再扭兩扭鎖緊，之後你想下面晾濕衫，上面擺廁紙都得。當然，唔係無限量放啲衫掛上去晾，要留意最多掛10公斤。
慳位2：夾窗框
窗口亦係一個理想晾衫位置，陽光普照時衣物可曬曬太陽，天涼時可吹吹風，一切來得天然！呢套「好易掛」鋁質掛架可以幫到手。掛架分三個組件，包括左右兩條掛臂同中間嘅伸縮棒。只要個窗係正常嘅普通窗框設計，「好易掛」都可以掛得上去，勁慳地方，安裝方便又靈活實用。
步驟一︰
每條掛臂都有２粒三角形螺絲，只要扭動佢哋，就可以將掛臂扣緊於窗框上面。
步驟二︰
掛臂上有個圓形按鈕，按下去就可調校唔同角度。然後放上伸縮棒，大功告成，可以晾衫啦﹗
慳位3：大廳中央
半夜三更，大家通常留在床上，客廳飯廳較少使用，呢個時候可以撐起一個較大型嘅晾衫架。當然，佢哋可晾掛衣物嘅數量一定最多。大家唔使擔心屋企會無位收藏，叫得摺叠式，摺埋同撐開size相差好遠。鋁質製，夠輕身，收起來方便快捷，摺起靠牆放埋一邊，就係咁簡單。
高身摺架
撐開後體積︰93×54×158cm
收起後體積︰10×54×158cm
售價︰$599（a）
中型摺架
撐開後體積︰94×45×116cm
收起後體積︰9×45×116cm
售價︰$399（a）
細件衣物盡用鬼鼠位
鬼鼠位1：小走廊
房與房之間的走廊其實都係一個好好嘅晾衫位置，牆與牆之間可撐一支伸縮棒作晾衫竹之用，但最好晾掛較短身的衫，以免阻礙出入；而單邊牆的話，則可出動吸盤晾衫架！
得意伸縮棒
晾衫竹嘅改良版──伸縮棒，鍾意放邊度用都得，只要調校好長度，撐住兩幅牆即刻用得；二來易於收藏，唔用嗰陣放入梳化底，即刻唔覺佢存在過咁。至於可以掛幾多件衫，真係因棒而異。棒棒有多款，顏色、粗幼、長度唔同，頂得住介乎10至20公斤濕衫重量，任君選擇。
真空吸盤吸實玻璃瓷磚
有時運用小智慧，屋企入面任何一處都有機會發揮，就好似呢個本身用嚟掛毛巾嘅真空吸盤咁。佢原理係先利用真空吸盤，吸實玻璃或光滑瓷磚表面，而撐開咗4支鋁架，可以180度自己轉動。真空吸盤如此方便，用嚟晾毛巾等輕形物件就最啱！
鬼鼠位2：CD架
可在儲放CD及DVD的架兩旁綁上一條繩，可晾一些如手巾、襪等超輕的衣物。
鬼鼠位3：書枱櫈背
可以將２至３個衣架由上至下扣成一個２層或３層的晾衫架，可晾薄身細件衣物，放在椅背。又或將衣架的鈎位扭一扭以便掛在門框上。
細細件好幫手
想真正慳位晾衫，其實唔單止要有個易於安裝、收藏嘅掛架或者晾衫架，最好配合埋特別設計嘅衫架。兩者同時配合，再留意多啲自己屋企有咩陰涼鬼鼠位，人家諗唔到可以掛嘅地方都俾你掛埋，咁樣先至係高手。
靚爆圈圈架
晾絲襪、晾絲巾、晾呔，點晾、用咩晾先至最好？相信利用設計到一身圈圈嘅Komplement就最啱。佢1架28個圈，真係你想掛幾多條都得。而且唔單止掛長條形衣飾方便，最緊要係外形討好。平日唔單止晾衫、掛衫，淨係掛喺牆身、櫃側或者門，用嚟擺都夠靚夠型。衫架可以做埋裝飾，平日唔多見啦！
掛裙掛褲排骨架
呢個排骨架設計到可以1架8個夾，足足一次可以夾住4條褲或者裙，認真幫你慳唔少地方。另外，中間兩排可以托高、可以分拆出嚟，活動性咁大，夾褲夾裙嗰陣唔會因為叠住幾層而變得唔方便。
夾架隨意加
專門為夾褲夾裙而設嘅SlacksHanger。架正中央紅色部份附設一個小鈎，可以將夾架一個又一個添加上去，加幾多個都無限制。你鍾意一個夠晒數都得，響屋企放高少少，夾多幾個同樣可以。
室內晾衫要小心
春去夏來，無論開住抽濕機定係冷氣機嚟晾衫，都有一啲家居安全事項須要注意。例如晾衫架切忌放得太近抽濕機，因為萬一濕衫滴水，隨時會導致漏電情況出現。可以嘅話，將晾衫架放遠少少之餘，仲要響架下面放條毛巾，以防滴水滴到四圍都係。
另外有點須要注意，現時好多人鍾意點香薰，但切忌將衫晾得太近香薰座，以免發生火災。
千萬別將衣物晾掛於鋁窗上，以免造成危險。
shoplist
（a）崇光︰銅鑼灣軒尼詩道555號7樓家品部28338338
（b）宜家︰銅鑼灣告士打道310號柏寧酒店地庫31250888