三集《職業特工隊》中，新的一集最好睇，當年睇完第一集，其實唔係太知職業特工隊係乜嘢組織，為啲乜、做啲乜？剩係知首主題音樂好有ActionFeel，又係大製作，於是人睇我又睇，咪執輸。第二集加了感情分，由港產大導演吳宇森執導，捧硬場，片中的吳氏招牌慢鏡頭拍得湯又型又俊，重有幾分武俠Feel㖭，中正了湯的心意。全球一片文學熱，大家衣食足，紛紛知榮辱地投向有內涵的懷抱，求娛樂唯有打電玩，《職業特工隊Ⅲ》則金九搶攻這個娛樂空虛，由頭到尾都緊張刺激，故事本來已經夠簡單，驚唔夠再找來炮製開電視劇嘅J.J.Abrams執導，用荷里活超級大製作的BackUp配合淺入淺出的電視劇講故事方法，一字咁淺，觀眾明晒。此片的剪接非常出色，不知道原劇本是否更平鋪直序說故事，但經剪接後將最重頭的湯與反派講數戲放在開頭，畫龍點睛，令電影充滿張力，也緊湊得多。
湯演出得尤其落力，Fit到漏油，動作場面一個鏡頭直落親身上陣，很有看頭兼贏得尊重，演技也有大發揮，與反派講數那場戲，反派由十倒數到一要脅殺死湯的老婆，每倒數一次Cut湯一個反應，湯則做足十個反應兼個個有推進由哀求到憤怒，由憤怒到認衰，最後不只淚眼盈眶，直情係用眼淚Gel住對眼，又俊又情深，女觀眾看得心動。
一直覺得湯告魯斯與劉德華很相像，大家都靚佬、聰明、努力、Keep得Fit、勇於嘗試、有陽光般的笑容。靚佬湯與靚佬華自出道開始便一直紅，希望他倆永遠紅，永遠帶給我們娛樂。