陶傑話鍾意日本有成千個理由，佢自己最鍾意日本嘅，就係日本搞西化、改革，脫亞入歐最耐，但始終唔肯放棄日文直排由右而左。日本好多傳統，其實學自中國，但人哋發揚光大，青出於藍，中國人就將傳統視為歷史垃圾，丟棄唯恐不及，當中一個最大罪人，梗係毛澤東啦。呢位魔怪一生讀古書，讀線裝書，讀由右至左嘅直排文字。但佢自己就一手摧毀中國文化，搞由左向右橫排，搞簡體字，搞文化大革命，煽動紅衞兵把歷史文物打個稀巴爛，此魔王對中國文化破壞之大，可講得係空前絕後。𠵱家北京在全世界推動建立「孔子學院」，教外國人學漢語，既以「孔子」為招牌，北京不如首先恢復漢語傳統，《人民日報》用番繁體字，或者即使係簡體字，都向日本《朝日》、《讀賣》看齊，由右至左直排啦。
香港報紙橫排成風，除咗有可能係向中央交心，表示政治正確，預備隨時改用簡體字之外，主要原因就係編輯美工人員懶惰，一味就住電腦方便，如果單係為咗呢項理由，日本人幾十年前就大搞橫排啦。日本報紙為咗運作方便，曾經研究過人物姓名全用片假名，摒棄漢字，例如小泉純一郎、村上春樹、課長島耕作等，全由片假名拼音代替，但日本知識分子極力反對，報館高層亦有多種意見，卒之仍然保留傳統，用番漢字姓名。
睇吓人哋既要國際化、全球化，又要維護本國傳統，平衡取捨，拿揑得非常準確，證明人哋真係有好多有識之士。好多中國人把口話反對國際化全球化，實質行為就淺薄西化，美其名曰追上時代。又有人講過寫學術論文，大量應用數學公式及符號，唔橫排唔得。唓，寫含有大量公式嘅論文，以自然科學為主，唔用英文寫，有鬼學術地位咩，用嚟嚇一啲無知之輩啫，等中國本土大學出番一百幾十個諾貝爾獎得獎者先至講中文學術論文都未遲！