大藍籌公司終於伸手，新鴻基地產（016）要抽走近百億元，港股應聲大幅滑落，恒指收市跌167點，報17133，期指跌得更多，唔見咗205點，17000大關危危乎。
唔夠1個月時間，加埋已有6家大公司在市場抽水，「晒士」唔細，成350億元，對個市肯定有壓力。大市谷到盡，衝破17000大關後，今次會借勢調整一下，守得住17000，仲有機會再上，但相信要過埋下半月中行上市抽水嗰關。
國企個勢冇大影響，個別發展，H指僅微跌6點，中國人壽（2628）仲有1個位進賬。哈爾濱動力（1133）新高後又新高，收8.40元，升0.45，升幅5.6%。推介哈動，除業績會繼續轉好外，最大理由就係貨源已落晒強者手中，一囗掣，升幾多，有幾多，任憑佢哋話事。另一隻就係中油（香港）（135），呢輪有大盤沽貨，噚日最低就質到4.375元，但上番4.675元，倒升3個位，沿途亦見有基金盤硬接，貨源再收亁後，要大升真係話咁易。
高寶綠色（274）盤數靚，宣布後股價大升，由0.95元搶上1.24元才出現調整，噚日收1.14元，跌3仙。
破位可見1.5元
05年（12月年結），高寶營業額7.69億元，升23.2%，盈利2.23億元，升112.5%，每股盈利0.24元，末期息派2仙，股東資金14.39億元，或每股1.55元。
盈利大增，主要係新會計準則之下來自金融工具增值之數有9200萬元，若不計此數及稅務開支，去年集團獲利1.4億元，每股盈利0.15元，往績PE7.6倍。
貢獻最大係曼詩貝丹（MB）化妝品及護膚用品業務，營業額3.5億元，升91.8%，佔總營業額由04年的29.4%上升到45.7%；經營溢利1.39億元，升54.6%。集團會大力拓展化妝品業務，預期收益可保持高增長。
另外，綠色再造能源業務亦已開展，預期07年底前可投產，08年開始可提供可觀的盈利貢獻。
現年度，估計高寶盈利可達1.8億元，不計項目增值之數，每股盈利0.19元，保守計PE8倍，股價已可見1.52元。高寶急升後正形成旗形整固，再破位而上，照度上去，目標亦係1.50元。
郭兆誠