相信唔少人都覺得好多商場或者商廈十足雪房一樣，究竟係咪真係有需要開咁勁冷氣呢？一啲大型商業樓宇每月嘅冷氣費開支，幾乎係天文數字，其實開細幾度冷氣，每個月慳埋啲錢，夠晒非洲國家班飢民解決三餐溫飽有餘。
所以，有責任心嘅管理公司一定會搞節能，呢度慳啲嗰度慳啲，大業主開心，班租客日常雜費都少啲；如果因為節能有功攞到獎，管理公司連面子都贏埋。仲量聯行管理嘅5幢商廈：灣仔大新金融中心、尖沙嘴北京道1號、北角萬國寶通中心、東涌嘅國泰城、中航大廈同港龍大廈，都獲得由機電工程署頒發嘅「香港能源效益獎」。
其中大新金融中心攞到「商業樓宇組」金獎，1年內節省咗23%能源，淨係電費已經慳咗17%。方法其實好簡單──縮短公眾地方燈光照明、調節外牆燈飾開關時間、調控冷氣溫度及鮮風量等，只要管理公司肯認真去做，業主租客肯將就一吓，大家就可以有個更環保、更健康、更慳錢嘅工作環境。