林青霞同老公邢李㷧早排成日被傳婚姻亮紅燈，兩公婆喺香港都好少拍拖出席公開場合，仲有消息話青霞已搬離邢家大宅。不過當青霞87歲嘅老父林維良上星期喺台灣因消化道出血入咗醫院，邢李㷧都立即陪青霞飛去台灣探病，兩個人關係應該唔係咁差。
青霞老父𠵱家仲喺台北市立聯合醫院留醫，聽講噚日病情開始好轉，醫院嘅公關室主任話林父病情逐漸穩定，但完全康服仲需要一啲時間。
樣子憔悴
林青霞兩夫婦噚日都有去醫院探爸爸，記者發現青霞眼濕濕咁，好似喊過嚟，佢個樣仲好憔悴，睇嚟好擔心。當記者向青霞夫婦講「對不起」，希望可以問一吓林爸爸嘅情況時，邢李㷧嘅保鑣立即上前擋駕，戴住黑超嘅邢李㷧好惡咁話：「對不起，甚麼對不起？」兩公婆都冇回應記者任何問題。
有消息指青霞夫婦有意租用私人飛機，然後送林父離開台灣接受治療。記者都發現青霞租嘅私人飛機噚日已降落喺中正機場，不過仲未發現林父被安排出院。因為林父長年有肝臟疾病，所以先有指佢屋企人想帶林父去內地做器官移植手術。
