昨日新地（016）失驚無神走出嚟批股，集資近100億銀，當堂震散其他地產股，亦令市場擔心大市係咪已經見頂。雖然好多人睇淡，但立即有分析員出嚟力撐，話新地今次集資，用作發展大陸地產，仲話新地負債比率低等，猛講好說話，總之就講到好正面。
另外，九龍建業（034）同保利達（208）公布配股後，昨日復牌。阿媽九建集資14億元，而阿仔保利達更勁，集資55億元。九建昨日跌3.68％，收13.10元，但保利達就上升，最高見2.525元，收2.325元，升4.49％。
經紀黃話，保利達size比較細，而且貨源好集中，今次配售新股，佔已擴大股本69.57％，成批貨由包括九建等16位投資者接晒，當中不乏有名的外資基金。保利達街貨咁疏都有人肯要，擺明有人好有信心兼肯坐貨，否則坐住咁大批貨，唔易在市場走得甩，保利達股價企硬，唔係冇道理。
慕容小初