六叔六嬸嘅電視廣播，旗下嘅無綫收費電視噚日正式公布，禮拜三起透過電盈旗下嘅now寬頻電視播送，簽約1年，月費138大元。若果閣下已經係now寬頻電視嘅客戶，喺月底前登記使用，仲可免費試睇2個月，若果滿意，第3個月月費仲減到128蚊，當然要簽1年約。
咁多優惠會唔會冇錢賺？無綫收費電視常務總裁陳錫年話，同8號仔合作，係希望可即時令上客數字大增，今年目標係喺55萬個now寬頻電視用戶入面，吸納三至四成做無綫收費電視客戶。由於吸客成本減少，相信就算同電盈分賬，都唔會影響佢哋收支平衡嘅時間。而且，聽講日後嗰20條無綫收費電視頻道嘅廣告時段，亦由無綫負責，即係再多個收入來源。
華華聽聞唔單止TVB開心，原來連廣告界嘅Mediabuyer都認為係好事。事關電盈近年見now寬頻電視十分成功，亦諗住加插廣告時段搵多啲水。
我得你唔得
但係佢哋近排突然去信廣告商，話以後所有廣告，若果推廣嘅產品同佢阿媽電盈嘅構成競爭，就唔准出街，事前仲要得電盈高層批准。
經典例子之一，係前姊妹機構CSL諗住5月3日晚係now寬頻電視播條廣告片，點知嗰日下晝突然收到廣告代理通知，話因為內容涉及3G同有線電視，同電盈生意有衝突唔播得；搞到CSL嗰邊紮紮跳，鬧電盈喺有線、TVB度賣廣告就得，人哋喺佢度賣廣告就唔得，冇guts。電盈解釋，由於有幾日假期搵唔到高層批核，所以咁遲至通知對方抽廣告。二少、阿叔，Wherewereyou?
李華華