老牌屋苑荔枝角美孚新邨，呎價普遍二、三千蚊有交易，但啱啱錄得嗰宗，竟然逼近5000蚊，仲創出近年新高㖭。中原美孚一期高級分行經理方麗娟話，百老滙街62號中層B室，有「凸海」之稱嘅全園景兼海景單位，面積1808呎，成交價900萬，呎價4978，不論呎價同銀碼都創97後新高，近幾年罕見。
呢類「凸海」單位，盤源極少，賣咗呢個之後，市場剩番唔夠5個，相對屋苑近千個放盤，只佔0.5%，物以罕為貴，自然賣得高價；加上同區新盤曼克頓山年內開售刺激，區內優質單位特別受追捧，呎價打破舊年紀錄，相對05年年底成交嘅百老滙街108號高層B室1831呎單位，成交價828萬元，呎價4522元，仲要高一成。
原業主喺04年12月以730萬買入，揸咗1年多轉手，升值兩成幾，賺170萬離場，升幅比普通單位高，可見業主夠眼光。
聽講買家本身住開美孚，早喺半年前已開始物色過千呎單位一心換樓，其間睇過唔少新盤，千揀萬揀，最終都係揀番樓齡已經34年嘅同屋苑單位。