大市係咁升，自然多公司抽水。昨日中國鋁業（2600）批股集資46億銀，雖然size大，但據講反應都OK。
另外，華晨汽車（1114）停牌，話配售1.8億美元可換股債券，一樣有人接晒，近期接二連三的抽水行動對大市全無影響，市場真係多錢得交關。
經紀黃問小初，有冇留意早排大股東減持舊股的超大現代（682），昨日晨早出現一宗大手上板，計落有成6626萬股或2.8％股權，每股造5.15元。
大股東上月沽1億股
經紀黃話，江湖傳聞有基金股東透過1間美資大行喺市場減持。查實超大上月初，大股東已按每股5.60元減持1億股，之後股價表現腳軟軟，今次呢位股東嘅配售價更加低，消息似乎唔多正面。
超大昨日下跌4.67％，收5.10元，成交股數8488萬股，金額4375萬元。
慕容小初