特區曾政府果然有啲運，煲呔明年要連任，現在個股市就炒到㷫烚烚。隻大笨象滙豐噚日創新高上到140蚊8毫，唔只小股民高興，連尊貴嘅議員亦好開心。八方噚日問單仲偕，佢話自己都有啲滙豐股票，不過冇打算賣，諗住留番嚟養老咁話。
單仲偕本身係滙豐員工，當然捧公司場。其實滙豐逾萬員工，都好想公司股價升，皆因佢哋有一項其他打工仔冇嘅福利，就係八折供股。簡單講，佢哋每個月可以存一筆錢（上限250鎊）在公司，存滿一個期限，例如3年、5年，可以將呢筆錢用當初協定嘅價格（一般係當時市價8折），買入公司股票。如果你中途走公司就畀番筆錢你，仲有息計番。
鄭海泉請食飯有料爆
舉個例，假如3年前開始供，當時係沙士，滙豐得80蚊左右，8折即係六十幾皮。咁你話今年期滿換咗股，每股賺一個開有多，好開心啫。而呢個供股計劃，係全世界滙豐員工都可以參加嘅，將公司利益同夥計利益連埋一齊，大家一齊博。李卓人應該好好向單仲偕收吓料，或者直接向鄭海泉大班取經，等以後為工人爭取權益時多啲瓣數，咪來來去去剩得最低工資一招。
講起鄭海泉，佢做華人第一大班之後，成日周圍飛，當然唔係去打哥夫去做Spa，而係去養魚去主持開球禮。今個禮拜八方會同佢食飯，聽吓佢講述今年經濟大勢。滙豐在05年股價表現平平，一直跑輸個市，呢兩個禮拜終於起動，相信鄭大班一定有嘢講，到時再報告畀各位知。
特區政府其實最想打經濟牌，佢哋覺得只要有樓炒有股炒，大家就會冇咁多怨氣，咁煲呔民望一定唔跌，有民望要連任就易過借火。如果呢個邏輯通，咁以前港英政府管治香港就真係易好多，只要搞掂滙豐怡和太古等幾個大班，或者向佢哋傾斜少少，咁佢哋肥仔之餘，啲小市民又可以炒佢哋嘅股票賺錢，咪冇人上街遊行囉。可惜時移世易，煲呔要打經濟牌唔係咁易，英國佬未必賣佢賬，只好向北望；所以佢咁辛苦調啲北水嚟，你班賓卡就唔緊唔要掛住放假，佢唔㷫就假，拍吓枱算畀面啦。
傳真︰2623-9278
電郵︰[email protected]