楊千嬅和梁漢文昨日為新歌《滾》拍攝MV，內容講他們因小事而爭執動粗，以咕𠱸互打，不過現實中兩人都表示反對情侶動手，千嬅更說：「又傷身又死咁多細胞，食幾多好嘢都補唔番啦。」
楊千嬅與梁漢文（梁炳）昨日到西貢1間豪宅拍攝新歌《滾》的MV，歌詞內容講及一對情侶鬧翻後爭執。新歌監製雷頌德為加強戲劇效果，更請來話劇導師為兩人排戲。拍攝時兩人都對對方郁手郁腳，先以咕𠱸互打，千嬅更粗魯地把梁炳推跌在梳化上。不過兩人接受訪問時都異口同聲說不能接受向愛侶動粗。
捍衞女權
千嬅說：「整傷自己就唔抵啦，又傷身又死咁多細胞，食幾多好嘢都補唔番啦。」被問到可會支持女士向男友動粗時，她續說：「雖然我係好捍衞女人同女權主義，不過女人都唔應該出手，男女都唔應該咁對待身邊人啦！」
反思己過
而梁炳則覺得男人打女人十分離譜，他說：「我喺中環見過男人打女人呀，見佢一巴扯埋去，真係好難接受，我當時想埋去幫手㗎，不過見到兩個彪形大漢走埋去制止囉。」千嬅又說遇上激氣事時會選擇默不作聲，她說：「我唔會亂咁發洩，幾年前就試過因為朋友而好激氣，於是就自己坐喺房入面，由下晝坐到夜晚，諗清楚自己有冇錯。」
採訪、攝影：藍文浩
