近年業主放盤，除咗透過代理搵客買之外，仲可以試吓用拍賣或者招標之類途徑出貨。元朗一座兩層高獨立屋，業主就委託卓先測量行標售，意向價只係880萬，分分鐘平過一個市區普通大單位。
卓先張家驥話，物業喺元朗八鄉，佔地逾7800方呎，除獨立屋外，仲連水池同花園。物業74年落成，舊年由投資者買入，花咗一兩百萬重新執過間屋，然後標售，都未住過。截標日期係6月7號。
另外，第一太平戴維斯就代理標售兩項物業，其中銅鑼灣渣甸坊5號地庫，約800方呎，連月租43.8萬元租約一併出售；旺角水渠道3至13號地下及閣樓C及D號舖，面積約1100方呎，連每月32萬元租約出售。兩物業截標日期同為6月14日。