飛機陳由大話西遊一路講到新馬命名，左丁山有幾個提議，但聽講飛機陳已有主意，就係叫隻馬做「有機可乘」，果然語帶雙關。做航空公司CEO，飛機陳自然希望所有乘客都有飛機可乘，架架飛機都坐滿乘客，而航空公司亦擁有大把客機，夠晒畀乘客坐。而跑馬咯喎，「有機可乘」就係指有機會贏啦，當同場有隻大熱門熱到兩倍時，飛機陳隻馬如果有機可乘，咁就爆嘞，可以偷雞得米。呢個名字咁精彩，一定諗咗好耐。
但係左丁山仍然認為中文名「藍天猛將」，配英文名Spitfire更合英式傳統，飛機陳間公司嘅大股東係英資公司噃，Spitfire戰機在二次大戰時為英國立下赫赫戰功，砌贏德國納粹戰機，揚威天空，堪稱「藍天猛將」。
不過專欄T取笑左丁山過咗時，𠵱家講求經濟融合，避免邊緣化，中國係未來大市場，CEO隻馬唔好掛上英國色彩啦。咦，又係噃，左丁山認真冇政治敏感度，諗深一層，改名為「米格凌雲」或者「神舟勇俠」重好。
與飛機陳講笑，請勿見怪。據左丁山多年馬場經驗，唔係四平八正嘅馬名，幾難有好成績。例如以前有一隻「生辰快樂」，真係一年只贏一次，因為一年只得一次生辰啫。任總裁曾經有一隻「自己友」（Insider），你估可以自己收埋嚟食咩，咪贏馬唔易囉，賽馬有唔少迷信，唔好唔信，隻馬叫做「有機可乘」嘅話，可能要等好耐先至有機會贏一場，而且係冷門頭馬㖭。
不過飛機陳以99%精神辦公事，1%精神講吓馬啫，問佢關於空中小姐四十五歲退休之事，佢話唔會夾硬嚟，會推出自願退休計劃，畀機艙服務員選擇，但係因為市場競爭大，譬如「星加坡女郎」就係好勁好勁嘅競爭者，而佢哋從來一紙Memo，全公司上下遵從，行政效率好到加零一，香港冇法子學到呢樣嘢（事實上香港人未必想學），飛機陳唯有大傷腦筋度橋嚟維持競爭力，CEO你估咁易做咩。