小超人李澤鉅終於為李家繼續香燈，有口痕友話，功臣除咗係為李太王儷橋改名嗰位高人，小超人揸fit嗰間長江生命科技可能都有功勞。若然長江生科真係研發咗幫人生仔嘅新技術，最開心嘅應該仲有有份供股嘅小股東喇！
講開長江生科，華華噚日發現佢哋嘅研究所所長張令玉，喺上個月19號同25號期間，減持咗1.7億股長江生科股份，當中有7102.2萬股唔知賣幾錢，另外嗰1億幾股，有4000萬股，每股賣出價11.1仙，其餘6000幾萬股就喺2.2仙沽嘅，張令玉都套現咗580萬蚊。
不過，長江生科近期股價都喺7毫左近，張令玉賣嘅應該唔係正股，而係供股權。當年長江生科上市時，張所長有接近4億股長江生科揸手，以2供1比例供股，即係話張所長有差唔多2億份供股權，賣咗八成半，即係張令玉唔係好想供股啦；咁睇嚟，長江生科係「喜得男孫」功臣嘅機會好微。